Krasnoperekopsk memuriyeti yolbaşçısı qabar alğanı içün yaqalandı

05.04.20178:50

Krasnoperekopsk memuriyeti yolbaşçısı 350 biñ ruble miqdarınen qabar alğanında şeklenilip yaqalandı.

Rusiye Federatsiyası Taqiqat komitetiniñ Qırım boyunca idaresi matbuat hızmetiniñ bildirgenine köre, memuriyet yolbaşçısına nisbeten «qabar aluv» maddesi boyunca cinaiy iş açıldı.

Taqiqatnıñ malümatına binaen, 2017 senesi aprel 4-te şeklenilgen kişi iş adamından, kelecekte bu iş adamı tarafından ticariy maqsatlarnen qullanılacaq belediye binalarınıñ kirağa alınuvı aqqında añlaşma tizilüvi içün 350 biñ ruble aldı.

Şimdiki vaqıtta şeklenilgen kişi yaqalanğan. Cinaiy iş boyunca taqiqat devam ete.

Müessise matbuat hızmetiniñ beyanatında şeklenilgen kişiniñ adı bildirilmey, amma şimdiki vaqıtta memuriyet yolbaşçısı İgor Yatsişin ola. O, bu vazifege 2015 senesi iyül 27-de tayinlendi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası