Qırımtatar faali Atem Çigoznıñ işi boyuca yüzünci mahkeme toplaşuvında şaat Saniye Ametovanı diñlediler.
Bu aqta adliyeci Nikolay Polozov video muracaatında bildirdi. Videonı Qırımtatar Qurultayı Merkeziy saylav komissiyasınıñ reisi Zair Smedlâyev Facebook saifesinde paylaştı.
Polozovnıñ sözlerine binaen, Saniye Ametova bildirdi ki, 2014 senesi fevral 26-da keçirilgen mitingde Ukraina tarafdarları olğan faaller iç tecavuz areketlerini etmedi, merasim başında «er şey tınç edi».
«14 senesi fevral 25-te oña Zaur Smirnov telefon etti ve bildirdi ki, fevral 26-da Qırım Muhtar Cumhuriyeti Yuqarı Radası binası yanında miting keçirilecek. O, Krasnoperekopsk rayonınıñ diger sakinleri ile beraber, fevral 26-da Yuqarı Rada binası yanına keldi, umumen olaraq, olar 30 adam edi. O yerde Ukraina tarafdarları ve Rusiye tarafdarları mitingleriniñ iştirakçileri endi buluna edi», – dep añlattı Polozov.
Ametovanıñ bildirgenine köre, olar mitingge öz bayraqları ile keldi, ve bayraqlar içün tayaqlarnıñ, onıñ sözlerine binaen, lesker içün qullanılması imkânsız edi, çünki bunda daa uzun ve ince tayaqlar qullanıla. O qayd etti ki, adamlarğa qayda turmaq kerek olğanını kimse aytmağan edi. Bunen beraber, Ametova ayttı ki, mitingde Qırım müftisi Emirali Ablayevni kördi, bundan soñ Refat Çubarov ve Ahtem Çiygoznı kördi.
Nikolay Polozov haber etti ki, şaatnıñ sorğuğa çekilüvinden soñ mahkeme toplaşuvı yekünlendi.
Aprel 5-te üyleden soñ Ahtem Çiygoznıñ apiste bulunma müddetiniñ uzattırılmasına qarşı onıñ imayesi bergen şikâyet arizası baqılması boyunca appelâtsion müessise toplaşuvı keçirildi. Qırım Yuqarı mahkemesi mahküm etilgenni ve onıñ adliyecisini nizamnı bozğanları içün toplaşuvdan çıqarmaq qararını aldı ve yayınlamanı, qaysı biriniñ vastası ile Çiygoz ve Polozov mahkeme toplaşuvında iştirak etken edi, söndürdi, dep bildire «Qırım.Aqiqat».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
