Aqmescitteki (Simferopol) «Privoz» bazarı yanında eki «Bogdan» marşrut avtobusınıñ çatışması neticesinde 14 kişi zararlandı.
Rusiye Federatsiyası İçki işler nazirliginiñ Qırım boyunca Yol areketi havfsızlığı devlet inspektsiyası (YAHDİ) matbuat hızmetiniñ bildirgenine köre, qaza tahminen saat 13:10-da yüz berdi. Avtobus aydayıcıları biriniñ haber etkenine köre, o, naqliyeni tehnikiy bozuv sebebinden toqtattı.
«Ekinci aydayıcı, ilk malümatlarğa binaen, diqqatını böldi ve ögünde turğan naqliyege uruldı», – dep bildire «RİA Krım» YAHDİ-niñ sözlerini.
YAHDİ-de qayd ettiler ki, areket etken «Ava limanı – Bavurçı (Kamenka)» avtobusında 20 adam buluna edi.
Qırım Sağlıq saqlav nazirligi matbuat hızmetiniñ bildirgenine köre, qaza neticesinde 10 adam zararlandı, olarnıñ biri – altı yaşındaki baladır.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
