Aprel 7-de Aqmescitte (Simferopol) McDonald’s restoranınıñ sabıq binasında «Mir Burger» fastfood qavehanesi açıldı.
Fastfood ağınıñ saibi Aleksey Çernâvskiyniñ qayd etkenine köre, interyerde bir şey deñişmedi, dep bildire «Krıminform».
Mühbirlerniñ «Mir Burger» ağı nasıl etip McDonald’s binasını alıp olğanı sualine Çernâvskiy adiy bir cevap berdi – satın aldıq.
Qavehane açılış merasimini Qırım parlamenti spikeri Vladimir Konstantinov da ziyaret etti.
Qırım haber agentliginiñ malümatına binaen, ukrain ağına ait olğan plakatlarnı körip, Konstantinov olarnı bu yerden almağa tevsiye etti.
«Ukraina qalımtılarını bu yerden alıñız», – dedi spiker.
McDonald’s Ukraine PR-müdiri Anastasiya Zrajevskaya «Qırım.Aqiqatqa» bildirdi ki, 2014 senesine qadar McDonald’s Qırım bölükleri bulunğan binalar şimdiki vaqıtta kimniñki olğanını bilmey.
Bundan evel haber etildi ki, Aqmescitteki demiryol vokzalı rayonında evel McDonald’s yerleşken binada belli rusiyeli repçi Timatiniñ Black Star Burger restoranı açılacaq. Bundan da ğayrı, içtimaiy ağlar qullanıcıları bu binada «RusBurger» yerleştirilecegi aqqında malümatnı muzakere etken edi. Lâkin, bu haber feyk oldı.
McDonald’s restoranınıñ Qırım bölükleri 2014 senesi aprel 3-te qapatıldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
