Aqmescitte (Simferopol) Çehova soqağı, 20 adresi boyunca yerleşken bina üstünde hatıra tahtası qoyuldı. Hususan bu yerde 1917 senesi aprel ayından başlap, 1918 senesi yanvar ayına qadar belli qırımtatar cemaat ve siyaset erbabı, yazıcı, şair, Qırım, Litvaniya, Poloniya ve Beyaz Rusiye musulmanları müftisi Noman Çelebicihan (1885–1918) çalıştı.
Farqlı senelerde bu binada Tavriya magometan diniy idaresi (1898–1920 ss.), Dünya Qırım musulman icra komiteti (1917 s.), Qırımtatar milliy parlamenti (1917–1919 ss.), Qırımtatar milliy müdirligi (1917 – 1919 ss.) ve «Millet» gazetasınıñ neşriyatı (1918–1920 ss.) bulunğan edi. Hatıra tahtaları qırımtatar ve rus tilinde yapıldı.
Hatıra tahtası açılış merasimi Noman Çelebicihannıñ Qırım, Litvaniya, Poloniya ve Beyaz Rusiye musulmanları müftisi vazifesine saylanılğanından 100 yıl tolğanına bağışlandı.
Hatıra tahtalarını tantanalı şekilde Qırım müftisi hacı Emirali Ablayev ve professor Fevzi Yaqubov açtılar.
Yaqında işbu binada Aqmescit regional meclisiniñ ofisi yerleşken edi. Qırımtatar Milliy Meclisiniñ (Rusiyede mahkeme tarafından 26.04.2016 yasaq etilgen) merkez ofisi 2014 senesi sentâbr ayında yaqalanğan soñ, bu yerde Avdet gazetasınıñ muarririyeti yerleşti, amma gazeta yañıdan qayd etüvden keçip olamadı ve şimdi adamlarnıñ desteginen 1000 nusha olıp neşir etile. 2016 senesi iyül ayında bu yerden em neşir hadimlerini, em de qırımtatar faallerini çıqardılar. Bundan evel ofisniñ pencerelerini bozğan ediler, Meclis toplaşuvı keçirilgen kün qapı ögünde bir yük maşnası topraqnı töktiler.
Avdetniñ evel bildirgenine köre, 1917 senesi mart 25-te (eski taqvimnen) Bütün Qırım musulman qurultayı Tavriya müftisi vazifesine Noman Çelebicihannı sayladı. O, Türkiyede em lâdiniy, em de ilâhiyat tasilini aldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
