Aprel 7-de Yedi Quyu (Lenino) rayonında dört yaşındaki qız ormanda coyuldı.
Rusiye İçki işler nazirligi Qırım Cumhuriyeti boyunca idare matbuat hızmetiniñ malümatına binaen, gece saat 3.00-te politsiyağa ormanda bala coyulğanı aqqında haber keldi. Rusiye İçki işler nazirligi rayon boyunca bölüginiñ bütün şahsiy erkânı, Yedi Quyu Fevqulade vaziyetler nazirligi bölüginiñ hadimleri ve avcılar celp etildi.
Eki saat keçken soñ, qız vaqia yüz bergen yerinden 2 kilometr uzaqlığında tapıldı. Bala, büyük mesafeni keçip, bir evçik yanında yuqlap qaldı. O yerde onı politsiya hadimi taptı. Buzlağan bala rayon hastahanesine ketirildi. Şimdiki vaqıtta onıñ alı yahşı.
Avdetniñ evel bildirgenine köre, mart 4-te Qarasuvbazar (Belogorsk) rayonınıñ Köktaş (Sinekamenka) köyü yanında ormanda 3 yaşındaki Ablâkim Ablâkimov coyuldı. Oğlannı bütün köy sakinleri qıdıra edi, qıdıruvğa yarımadanıñ çeşit köşelerinden kelgen qırımtatarlar qoşuldı. Ablâkim tahminen 17 saat devamında ormanda bulundı, onı saba saat 5-te evinden bir qaç kilometr uzaqlığında taptılar. Bala Qarasuvbazar merkez rayon hastahanesine umumiy aşırı suvutma diagnozı ile ketirildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
