Aqyarda (Sevastopol) Balıqçılar medeniyet evi yanında cayav keçitinde avtobus az qaldı üç balanı uracaq edi.
Vaqia aprel 9-da, saat 14:30-da yüz berdi.
Üç bala yolnı cayav keçitinden keçe edi. Vaqia şaatı, içtimaiy ağda video paylaşqan aydayıcı, balalarğa yol bermek içün toqtadı, lâkin, sağ yol şeritinde keçitke apansızdan yolcu avtobusı çıqtı. Balalar bir saniye içinde arqa çapmağa yetiştirdi. Amma videoda körüne ki, bir balağa avtobus tiydi.
Aqyarlılar bildire ki, aydayıcı ve marşrut saibi endi belgilendi ve olarğa nisbeten taqiqat işleri alıp barıla.
«Aydayıcı marşrut saibi («Zenit avtotrans») tarafından belgilendi, müdir ve aydayıcı Yol areketi havfsızlığı devlet inspektsiyasında buluna, kerekli tedbirler alıp barıla. Aydayıcı, ilk malümatlarğa köre, cinayetçi degil, amma şirket müdirleri onı işten boşatmaq meselesini baqa», – dep bildirdi Vkontakte içtimaiy ağınıñ qullanıcısı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
