«Bağçasaraylı dört yaqalanğan kişiniñ» apiste bulunma müddeti bir ayğa devam ettirildi

10.04.20179:44

Qırım mahkemesi Bağçasarayda «Hizb ut-Tahrir» işi boyunca yaqalanğan kişilerniñ apiste bulunma müddetini bir ayğa uzattırdı.

Bu aqta aprel 9-da Qırım adliyecisi Emil Kurbedinov bildirdi.

«Olarnıñ episiniñ (Bağçasarayda «Hizb ut-Tahrir» işi boyunca yaqalanğan kişilerniñ, – Avdet) apiste bulunma müddeti bir ayğa devam ettirildi. Mahkeme toplaşuvı bir kereden bütün yaqalanğanlar boyunca keçirile edi, qabaatlanğanlarnıñ episi dört kişi qafeste buluna edi. Qabaatlav tarafı nasıldır operativ malümatnı taqdim etti ki, bu adamlar (qıtaiy, – Avdet) Ukrainada siyasiy mabuslar olaraq tanılğan. Qabaatlav tarafı qayd ete ki, bu, olarnı yibermemek içün bir sebeptir, çünki Ukraina qabaatlanğan kişilerge öz territoriyasına keçmege yardım etecek», – dep ayttı Kurbedinov.

Adliyeci qayd etti ki, «üç kün içinde şikâyet arizası berilecek, bundan soñ bu ariza Qırım Yuqarı mahkemesinde baqılacaq», dep bildire «Qırım.Aqiqat».

Avdetniñ bildirgenine köre, 2016 senesi mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Rusiyede terroristik tanılğan «Hizb ut-Tahrir» teşkilâtınen bağlı olğanında şeklenile.

«Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme qararnı daa çıqarmağanına baqmadan, terrorist ve ekstremistler cedveline kirsetildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET