Aqmescit Merkez bazarında ticaret noqtalarınıñ yıqtırılması boyunca tafsilâtlı malümat peyda oldı (VİDEO)

11.04.201714:53

Aqmescit (Simferopol) Merkez bazarı yanındaki territoriyada bu aftanıñ soñuna qadar qanunsız ticaret noqtaları bütünley yoq etilecek.

Bu aqta Qırım paytahtı memuriyetiniñ yolbaşçısı Gennadiy Baharev, bu yerde bulunıp, bildirdi.

O hatırlattı ki, ticaret noqtalarınıñ yıqtırılması aqqıda söz 2015 senesi, baarde yürsetilip başladı.

ц.рынок1

«Eki yıl devamında o yerde bulunğan iş adamlarınıñ çoqusınen boş laflar alıp bardıq. Bazıları yahşı davrandı, olarğa minnetdarım. Olarnen kelecekte işbirlik tutacaqmız, olar ne yerde ve nasıl ticaretini alıp baracağı aqqında bir-eki fikir bar. Bütün muracaat ve haberlerimizni körmemezlikke urğan kişiler şimdi ticaret noqtalarını mecburen yoq ete», – dep añlattı şeer memuriyeti yolbaşçısı.

Onıñ sözlerine köre, qanunsız binalar yıqtırılğan yerde politsiya hadimleri buluna, olar qanuniy nizamnı teminley. Şimdiki vaqıtta işlerniñ alıp barılmasına qarşılıq bildirüv olmadı. Bugünki künde Merkez bazarında ticaret noqtaları yıqtırılması ve faaliyet toqtatılmasınıñ zararı 7 million rubleni teşkil ete.

ц.рынок

Bugün saba erte politsiya hadimleri Merkez bazarı territoriyasını sarıp aldı, ekskavatorlar meydanda tükânlarnı içinde bulunğan mahsulatnen beraber yoq ete. Şeer sakinleriniñ bunen bağlı fikirleri farqlı oldı. Bazıları bu yerde nizam qurmağa qarar alğan akimiyetke qol tuta. Aqmescitlilerniñ bazıları da tükânlar içindeki mahsulatnen beraber yıqtırılğanından açuvlana.

«Neler ola şu. Meyva ve sebzeni alıp ta, quruculıq çöplükke atalar», – dep ayta bazar hadimleriniñ biri.

Merkez bazarı hadimlerini ise, bugün işke çıqmamağa çağırdılar, dep bildire «Seyças v Krımu».

Avdetniñ bildirgenine köre, aprel 11-de saba Aqmescit (Simferopol) Merkez bazarı yanında yaqalanğan kişilerni taşığan mahsus politsiya maşnaları köründi.

Bundan evel Qırım paytahtı memuriyeti Aqmescit Merkez bazarında ticariy «noqtalarınıñ» saiplerini, göñülli olaraq, qayd etilgen qaide bozuvlarınıñ tüzetilmesi çerçivesinde bu alış-veriş noqtalarını yoq etmege mecbur etti. Şeer akimiyeti haber etti ki, yerli ükümetnen işbirlik tutqan iş adamları bir sıra yatırım leyhalarınıñ ömürge keçirilmesinde iştirak etmek aqqını alacaq. Merkez bazarında qanunsız çalışqan ticariy obyektlerniñ yoq etilüvi noyabr 8-de başlandı. Şeer akimiyeti ticaret pavilyonları bulunğan yerde çimen yapacaq ola.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET