Aprel 11-de Qırım Yuqarı mahkemesi «Çiygoznıñ işi» boyunca imayeniñ eki şaatını sorğuğa çekti, olar qabaatlanğan kişi Rusiye tarafdarları olğan miting iştirakçilerine nisbeten zorbalıq areketleri yapqanını tasdıqlamadı.
Bu aqta adliyeci Nikolay Polozov bildirdi.
Birinci şaat, Ali Abdullayev, añlattı ki, Ukraina tarafdarları olarnı Rusiye tarafdarları olğan miting iştirakçilerinden ayırğan militsiya sıraları yanında olğanda, «Ahtem Çiygoz adamlarnı arqağa çekilmege çağıra edi, miting iştirakçileri biraz arqağa çekilsin dep, elnen işaretler köstere edi. Ve miting iştirakçileri bunı tınçlandırğan areketler olaraq añlay edi, yani bir şey yapmağa çağırğan areketler olaraq degil. Bu, tek Meclis (Rusiyede 29.09.2016 yasaq etilgen) tarafdarları añlağan nasıldır mahsus işaretler degil, adiy adam yapqan işaretler edi».
Şaat qayd etti ki, Ukraina tarafdarları olğan faallerniñ zorbalıq areketleri etkenlerini ya da Qırım Muhtar Cumhuriyeti Yuqarı Radası binasına kirmege tırışqanlarını körmedi. Miting iştirakçileriniñ barışıq niyetlerini sorğuğa çekilgen ekinci şaat da – Sabri Ametov tasdıqladı.
Bundan da ğayrı, aprel 11-de keçirilgen toplaşuvda «Çiygoznıñ işi» boyunca imayeniñ şaatı olaraq Qırım ükümeti milletler meseleleri boyunca Cumhuriyet komitetiniñ sabıq yolbaşçısı Edem Dudakov da sorğuğa çekildi.
Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
2016 senesi sentâbr 29-da Rusiye Yuqarı mahkemesi Qırımtatar Milliy Meclisi ekstremistik cemaat teşkilâtı olğanını tanıdı ve onıñ faaliyetini Rusiye Federatsiyasında yasaq etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
