Qazahistan başı Nursultan Nazarbayev qazah elifbesini latin urufatına keçirmege avale etti.
Onıñ sözlerine köre, 2025 senesine qadar latin urufatına bütün kitap, iş vesaqaları, devriy neşriyat keçirilmek kerek.
Qazahistan prezidenti Nursultan Nazarbayev devlet ükümetine qazah elifbesiniñ latin urufatına keçirilmesi cedvelini 2017 senesi soñuna qadar işlep çıqarmağa teklif etti. Bu aqta Qazahistan ükümetiniñ portalında malümat bildirile.
Prezidentniñ qayd etkenine köre, bu, «siyasiy sebeplernen» bağlı. Nazarbayev tarihiy malümatnı hatırlattı ki, zemaneviy Qazahistan territoriyasında farqlı urufat qullanılğan edi. O, qazah elifbesiniñ qadimiy tamırları, yani Avrasiyada qadimiy türk run yazısı peyda olğanından, yani «VI–VII asırlardan» kelgenini qayd etti.
Nazarbayev hatırlattı ki, X-cı asırdan XX-cı asırğa qadar islâmnı qabul etken türk halqları arap elifbesini qullana edi. 1929 senesi Qazah Sovet Sotsialistik Cumhuriyetiniñ Merkeziy icra komiteti latin urufatı esasında «Yekâne türk elifbesiniñ» işke tüşürilmesi aqqında fermannı qabul etti. Kirill urufatına ise, 1940 senesi keçtiler, dep bildire «RBK».
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
