Tünevin, aprel 12-de «Bizim balalar» cemaat birleşmesi babaları apiste bulunğan balalar içün Respect Hall musafirhanesinde raatlıqnı teşkil etti.
«Küneş, deñiz, bayrağımız kibi mavı kök, dağlar, çiçekler, terekler, oyunlar, master-klasslar, lezetli aşlar, havuzdaki +38 dereceli suv, balalarnıñ külgüsi, olarnıñ anaları yüzlerinde körüngen raatlıq. BİZİM BALALAR içün bu kün «Respect Hall»da böyle keçti. BİZİM BALALARĞA quvanç ketirgen er kes sağ olsun», – dep yazdı «Bizim balalar» cemaat birleşmesiniñ teşebbüsçisi Lilâ Bucurova Facebook saifesinde.
«Bizim balalar» cemaat teşebbüsi 2016 senesi yazda Aqmescitte teşkil etildi. Birleşme apiste bulunğan Qırım musulmanlarınıñ balalarına daimiy şekilde yardım köstermek içün teşkil etilgen. Teşkilât SİZO-da bulunğan qırımtatarlarnıñ balalarına em maddiy taraftan yardım köstere, em de bayramlar keçire.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
