Midat Mujdabayev ve Seydamet Mustafayev memuriy yaqalavnen cezalandı

14.04.201711:40

Bağçasaray mahkemesi aprel 13-te saba evlerinde tintüvler keçirilgen Midat Mujdabayev ve Seydamet Mustafayevge nisbeten qararlar çıqardı.

Böyleliknen, 22 yaşındaki Midat Mujdabayevge nisbeten Rusiye Federatsiyası Memuriy qanun bozuvı aqqında kodeksiniñ 20.2.2-ci maddesi (cemaat nizamını bozuvnıñ sebepçisi olğan vatandaşlarnıñ bir vaqıtta cemaat toplaşqan yerlerde kütleviy şekilde toplaşqanını ve (ya da) areket etkenini teşkil etüv) ve 20.3-ci maddesi (milliyetçi timsallerini, ya da ekstremistik teşkilâtlarnıñ timsallerni, ya da federal qanun boyunca halq ögünde kösterilmesi yasaqlanğan timsallerni teşviq etüv ya da halq ögünde kösterüv) boyunca memuriy protokollar tizildi. O, üç kün yaqalavnen cezalandı. 34 yaşındaki Seydamet Mustafayev ise, Rusiye Federatsiyası Memuriy qanun bozuvı aqqında kodeksiniñ 20.3-ci ve 20.29-ci maddesi (ekstremistik malümatlarnı işlep çıqaruv ve tarqatuv) boyunca qabaatlı tanıldı. O, 12 kün yaqalavnen cezalandı.

Avdetniñ bildirgenine köre, bugün saba Bağçasaraynıñ 6-cı ve 7-ci qasabalarında Seydamet Mustafayev ve Midat Mujdabayevniñ evlerinde tintüvler keçirildi.

Ev saiplerinden ğayrı, uquq qoruyıcılar dört yerli sakinni yaqaladı. Olarğa nisbeten memuriy protokollar tizildi.

İçki işler nazirliginiñ Qırım boyunca baş idaresi matbuat hızmeti bugün Bağçasarayda keçirilgen tintüvlerniñ «Rusiyede yasaq etilgen teşkilâtnen bağlı olğan şahıslarnı belgilemek maqsadınen plan boyunca yapılğan tedbirler» olğanını ayttı.

İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

сейдамет мустафаев
Seydamet Mustafayev
Мидат Муждабаев
Midat Mujdabayev
Фото аватара

Автор: Редакция Avdet

Редакция AVDET