Rusiye «Eurovision-2017» yarışında iştirak etmeycek

14.04.201710:15

Avropa yayınlama birligi resmiy olaraq ilân etti ki, Rusiye «Eurovision-2017» halqara yır yarışında iştirak etmeycek.

Alâqalı beyanat muzıkal yarışınıñ saytında derc etildi.

Bundan evel Rusiyede er sene «Eurovision» yarışını yayınlağan «Birinci kanal» bunı 2017 senesi yapmağa red etti.

Böyle qararnıñ sebebi, «Rusiyeni temsil etken Yuliya Samoylovanıñ «Eurovision-2017» yarışında iştirak etüvinen bağlı meseleni çezip olamağan» Avropa yayınlama birliginiñ mektübi oldı.

«Birinci kanal ukrain tarafınıñ yasaqlavını bir şeyge esaslanmağanını saya. Bunıñ sebebi, Ukrainanıñ 62 yıl devamında adamlarnı birleştirmek maqsadı olğan yarışnı siyasiy maqsatlarnen qullanmaq ıntıluvıdır», – dep aytıla kanalnıñ beyanatında.

Bunen beraber, olar, Yuliya Samoylovanıñ uzaqtan iştirak etüvi ya da onıñ yerine diger yırcınıñ yollanılmasına razı degil.

Avdetniñ evel bildirgenine köre, mart 22-de Kiyev Rusiyeden «Eurovision-2017» yarışınıñ iştirakçisi Yuliya Samoylovanıñ devletke 3 yıl müddeti devamında devletke kirişini yasaq etti.

Hatırlatamız ki, Kiyev, 2016 senesi Stokgolm şeerinde Jamala ğalebe qazanğan soñ, «Eurovision-2017» yarışını keçirmek aqqını aldı. Yarış finalı mayıs 13-te keçirilecektir.

Mart 13-te Avropa birligi Şurası Ukraina topraq bütünligi ve mustaqilligini bozuvnen bağlı kirsetilgen sanktsiyalarnı daa yarım yılğa uzattırdı. Bu müddet 2017 senesi sentâbr 15-ke qadar devam etecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET