Aqmescitte quş fabriqası yandı

17.04.201712:05

Aprel 16-da aqşam Aqmescit (Simferopol) rayonınıñ Badana (Perovo) köyünde «Yujnaya» quş fabriqasında yanğın yüz berdi.

Rusiye Fevqulade vaziyetler nazirligi Qırım boyunca Baş idaresi müdiriniñ yardımcısı Vladimir İvanovnıñ haber etkenine köre, ateş tahminen 400 kvadrat metrni qaplap aldı.

O, qayd etti ki, yüz bergen vaqia aqqında haber qurtarıcılarğa saat 19:28-de keldi, dep bildire «RİA Krım».

Yanğın saat 22:00-de bütünley söndürildi.

Vaqia yüz bergen yerde yanğıncı-qurtarıcı hızmetiniñ dört bölügi çalıştı.

«Quş fabriqasınıñ qullanılmağan binası yandı. Tahminen 400 kvadrat metr binanıñ damı yandı, qalğanını qurtarıcılar saqlap oldı. Elâk olğanlar ve zararlanğanlar yoq», – dep ayttı İvanov.

Ekspertler yanğın sebebini ögrenecek. Bunen beraber, müessise yanğın ketirgen zararnı belgileycek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası