#Baba_evi: Babamı onıñ evi azbarına bile yibermegen insanlarnı o, alman işğalcilerinden azat etken edi

17.04.201710:50

Facebook içtimaiy ağında #baba_evi fleşmobı devam ete. İçtimaiy ağ qullanıcıları Qırımda 1944 senesi sürgünliginden evel qurulğan, bunen beraber, bugünki künge qadar saqlanıp qalğan baba-dede evleri aqqında şahsiy ikâyelerinen paylaşa.

Kermençik (şimdiki vaqıtta Bağçasaray rayonındaki Vısokoye, – Avdet) köyünde, rametli anamnıñ evinde bu köyniñ sabıq sakini, urumnıñ qız torunı qorantasınen yaşay.

90-cı seneleri bu urumnıñ (Fedâ efendi) maña añlatqanına köre, o, cebeden qaytıp, acele evlendi ve milliy mensüpligini, Qırımdan sürgün etilmemek içün, apayınıñ milletine deñiştirdi. Onıñ torunı, bir qaç yıl evel köydeşler körüşüvine kelgenimizde, anamnıñ evi azbarına uydurılğan sebepten bizni yibermedi, bizden büyük köpeknen qoralanıp.

Rametli babam cenkni başından soñuna qadar keçti, Kursk kemerinde uruşta iştirak etken edi. Qader istizası öyle oldı ki, 1944 senesi onıñ evine cenk vaqtında o, alman işğalcilerinden azat etken yerlerniñ (Voronej) sakinleri yaşamağa kirdi. 70-ci seneleri babam, cenk mukâfatları taqılğan kostümni kiyip ve Özbekistandan ediyelernen torbasını alıp, bir özü Sahtik (şimdiki vaqıtta Aqyarnıñ Balıqlava rayonındaki Pavlovka, – Avdet) köyündeki tuvğan evine keldi, azat etilgenler olarnı azat etkenni onıñ evi azbarına bile yibermedi, ve babama onıñ doğğan ve ösken evine qoradan baqmağa teklif etti… O vaqıt babam 70 yaşında edi…

Bazı vaqıtları ahlâqsızlıq ve zalımlıq bu ve bularnıñ kibi adamçıqlarnıñ qanında olğanı kibi körüne, bundan sebep, olarğa umuminsaniy şeylerni ögretmege tırışmaq – boşuna vaqıt ve küç coymaqtır…

İster edim ki, fikrim yañlış olsun.

Nuri BEYTULAYEV

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.