Kezlevde (Yevpatoriya) uquq qoruyıcılar bir qasabanıñ qısmını, bu cümleden, umumtasil mektebi toprağını sarıp aldı.
Bu areketlerniñ sebebi, havflı alet aqqında anonim telefondan yalan haber oldı.
Rusiye İçki işler nazirligi Kezlev boyunca bölüginiñ kütleviy haber vastaları ile ağlar boyunca mütehassısı Yuriy Raslinniñ sözlerine binaen, politsiyağa şeerde havflı alet bulunğanı aqqında haber keldi. O, qayd etti ki, salı künü saba erte telefon etildi. Amma alet bulunğan yerni aytmadı. Aynı vaqıtta Fevqulade vaziyetler nazirligi Kezlev idaresinde bildirdiler ki, o yerge yanğıncı avtomobili çıqqan edi.
«Maşna saat 9.01-de çıqtı, saat 11.15-te qayttı. Bizge kelmege rica etildi, biz uzaqtan tura edik, bir şey (havflı alet, – Avdet) qıdırmağan edik», – dep qayd ettiler müessisede, bildire «RİA Krım».
Hatırlatamız ki, Sankt-Peterburg şeerindeki metroda yüz bergen facialı vaqia ve Rostov-na-Donu şeerindeki mektep yanında yanğırağan patlavdan soñ, Rusiye sakinleri cemaat toplağan yerlerde şübeli şeylerge diqqatlı davranmağa çağırıldı. Aprel 4-te yarı gecede Yaltadaki Polikurovskiy bayırınıñ sakinleri öz elinen yapılğan patlatıcı aletke oşağan şübeli alet taptı. Aprel 10-da Aqmescitteki (Simferopol) Lenin adına meydanında abide yanında belli olmağan şey tapıldı, bundan sebep İçki işler nazirligi ve Fevqulade vaziyetler nazirliginiñ hadimleri abide territoriyasını sarıp aldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
