Sankt-Peterburg şeerinde qırımtatarlarğa destek olaraq keçirilgen bir kişilik piket vaqtında teşebbüsçi yaqalandı

19.04.20178:50

Sankt-Peterburg şeerinde «Strategiya-18» teşebbüs gruppasınıñ faali Vsevolod Nelayev Qırımğa destek olaraq keçirilgen bir kişilik piket vaqtında yaqalandı.

Birleşmeniñ malümatına binaen, o, aprel 16-da Peterburgda keçirlgen «muhalifet kezintisi» narazılıq aktsiyası içün yaqalandı.

«Belginengen malümatqa köre, politsiya hadimleri Vsevolod Nelayevni Nevskiy caddesinde qırımtatarlarğa destek olaraq keçirilgen «Strategiya-18» piketlerinden aldı ve 78-ci politsiya bölügine alıp ketti, o, o yerde endi 2 saat devamında buluna. O, mart 16-da keçirilgen piketlerde iştirak etkeni içün degil de […], Peterburgda er bazar künü keçirilgen muhalifet kezintileri içün yaqalandı. Hususan söz, kezinti iştirakçileriniñ kütleviy şekilde yaqalanuvı yüz bergen aprel 16 künü aqqında yürsetile. Vsevolod Nelayev iç bir vaqıt bu merasimlerde iştirak etmegen edi, ve, demek ki, o, mart 16-da muhalifet kezintisinde bulunmadı. Şimdiki vaqıtqa qadar oña nisbeten iç qabaatlav taqdim etilmegen edi», – dep aytıla beyanatta.

Bundan soñ belli oldı ki, Sankt-Peterburg prokuraturası Vsevolod Nelayevniñ mart 16-da keçirilgen piketlerde iştirak etkenini teşkere, çünki plakatta «Putin – halqara terrorist» ibaresi yazılğan edi, bu ise, olarnıñ fikrince, «nefret ya da duşmanlıqqa yol berüv, yani adamnıñ ar-namusına toqunuv» (Rusiye Federatsiyası Cinaiy kodeksiniñ 282 maddesi 1-ci qısmı) olaraq baqıla bile, dep bildire «Qırım.Aqiqat».

Avdetniñ evel bildirgenine köre, ilk sefer qırımtatarlarğa destek olaraq «Strategiya-18» bir kişilik piketleri noyabr 18-de Sankt-Peterburg şeerinde keçirildi. Aktsiya teşebbüsçileri, çeşit demokratik firqalar ve areketlerden vatandaş faaleriniñ gruppası oldı.

Foto: Qırım.Aqiqat. Arhiv

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.