Daa bir qırımtatar kişi akimiyetni küçnen elge keçirmege tırışqanınen qabaatlana

20.04.201716:50

«Hizb ut-Tahrir» işi boyunca Bağçasarayda yaqalanğan Enver Mamutov «akimiyetni küçnen elge keçirmek ıntıluv» içün yañı qabaatlav taqdim etildi.

Bu aqta aprel 20-de adliyeci Emil Kurbedinov bildirdi.

«Bugün, aprel 20-de, «Hizb ut-Tahrir» işi boyunca Bağçasarayda yaqalanğan Enver Mamutovğa Cinaiy kodeksiniñ 278-ci maddesi boyunca yañı qabaatlav taqdim etildi – Rusiyede akimiyetni küçnen elge keçirmek ve Anayasa nizamını deñiştirmek ıntıluv! Bu iş boyunca qabaatlanğan er kes böyle vaziyetke tüşecek!» – dep yazdı adliyeci Facebook saifesinde.

Bundan evel bu kibi qabaatlavlar Vadim Siruk ve Enver Bekirovğa taqdim etildi.

Avdetniñ bildirgenine köre, 2016 senesi mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Rusiyede terroristik tanılğan «Hizb ut-Tahrir» teşkilâtınen bağlı olğanında şeklenile.

«Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme qararnı daa çıqarmağanına baqmadan, terrorist ve ekstremistler cedveline kirsetildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası