Aqmescitte Cuma Cami temeli qoyulıp başladı

22.04.201712:35

Bugün, aprel 22-de Aqmescitte (Simferopol) Cuma Cami temeli qoyulıp başladı. Caminiñ açılışı 2019 senesi aprel 21-ge planlaştırılğan.

Temel qoyulıp başlamazdan evel Kebir cami imamı Edem Lümanov dua etti.

«Cami quruvı keçken sene oktâbr ayından başlap devam ete, endi eki bina quruldı – Qırım musulmanları diniy idaresi ve musafir azbarı. Şimdi esas cami binasınıñ temeli qoyulıp başladı», – dep bildirdi işni ömürge keçirgen «İnkişaf sanayı» («İndustriya razvitiya») şirketiniñ müdiri Enver Emiraciyev.

Onıñ sözlerine köre, cami temeline 1,9 biñ kubik metr qoyulacaq. Camide birden 2,6 biñ adam buluna bilecek, bunen beraber, içki azbarğa, adam çoq olğan bayram künleri, daa 800 kişi sığa bilecek. Umumen olaraq, cami meydanı 5785 kvadrat metr, bütün kompleks yerleşken meydan ise, 3 gektarnı teşkil ete. Emiraciyev qayd etti ki, kompleks territoriyasında maşnalar içün kiriş zonası da olacaq, dep bildire «RİA Krım».

Cami şeerniñ cenübinde, Aqmescit suv anbarı rayonında qurula. Leyhağa binaen, Cuma Cami 2 qısımdan ibaret olacaq – esas bina ve iç azbarı. Binanıñ köşelerinde 50 metrlik 4 minare qurulacaq. Azbarda abdest alınması içün şadırvan yerleştirilecek. Caminiñ qoşma tıştan kiriş-çıqışları olacaq.

Avdetniñ evel bildirgenine köre, Aqmescit mühbirleri ve ayrı teşkilâtlar azalarınıñ bazıları cami quruluvınen bağlı meseleden narazılıq bildirip başladı. Olar, suv anbarı qorunğan zonasında sanki kontrol etilmegen çam terekleri yoq etilüvinden memnün olmadı. Lâkin, Qırım müftiyatı matbuat hızmetinde añlattılar ki, bu mesele ükümet temsilcileri ile endi uyğunlaştırıldı ve bütün kerekli tedbirler yapıldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

джума джами

Фото аватара

Автор: Редакция Avdet

Редакция AVDET