Aqyarda (Sevastopol) şeer hastahanesinde bala ölgeni munasebetinen cinaiy iş açıldı.
Yerli Taqiqat komiteti matbuat hızmetiniñ bildirgenine köre, aprel 15-te oğlan şeer yuqunçlı (infektsion) hastahanesine bronhit diagnozınen ketirildi. Üç künden soñ bala, alı yaramaylaşqanı sebebinden, 5-ci şeer hastahanesine ketirildi, o yerde bir künden soñ reanimatsiya bölüginde vefat etti.
Taqiqatnıñ elinde olğan malümatqa köre, bala tibbiy hadimlerniñ vazifelerini yaramay becergenleri içün vefat etti.
Bala ölgeni qayd etilgen soñ, müessiseden bütün kerekli tibbiy vesiqalar alındı, şimdiki vaqıtta bu vesiqalar ögrenile. Bunen beraber, oğlannıñ ölümi sebepleri ve şaraitini, balanıñ tedaviylenüvi içün mesüliyetli şahıslarnı belgilemek içün bir sıra ekspertiza keçirilecek.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
