Qırım mahkemesi Bağçasarayda «Hizb ut-Tahrir» işi boyunca yaqalanğan kişilerniñ şikâyet arizalarını red etti

25.04.201721:30

Qırım Yuqarı mahkemesi Bağçasarayda «Hizb ut-Tahrir» işi boyunca yaqalanğan kişilerniñ cezalanması belgilenüvi boyunca şikâyet arizalarını qanaatlendirmedi.

Bu aqta aprel 25-te Qırım adliyecisi Edem Semedlâyev video muracaatında bildirdi.

«Mahkemeci yigitler ve olarnıñ adliyecileri bergen bütün şikâyet arizalarını red etti. Mahkeme toplaşuvı qapalı şekilde keçirile edi. Ne içün böyle olğan, degen sualge, mahkemeci cevap bermekten vazgeçti, tek bir şey yaptı – aprel 24-te çıqarılğan qararnı oqup berdi. Lâkin, adliyecilerniñ ellerinde aprel 25-te çıqarılğan qarar bar edi, o yerde toplaşuv açıq şekilde keçirilecegi aqqında yazılğan», – dep bildirdi adliyeci.

Böyleliknen, evel qabul etilgen qarar red etilmedi.

Aprel 9-da Qırım mahkemesi Bağçasarayda «Hizb ut-Tahrir» işi boyunca yaqalanğan kişilerniñ apiste bulunma müddetini bir ayğa uzattırdı.

Avdetniñ bildirgenine köre, 2016 senesi mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Rusiyede terroristik tanılğan «Hizb ut-Tahrir» teşkilâtınen bağlı olğanında şeklenile.

«Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme qararnı daa çıqarmağanına baqmadan, terrorist ve ekstremistler cedveline kirsetildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası