Jamalanıñ toyu aqqında fotoreportaj

27.04.201722:15

Yırcı Jamalanıñ toyu qırımtatar adetleri boyunca keçirildi. Kiyevdeki islâm medeniyet merkezinde nikâh qıyılğan soñ, banket teşkil etildi. Bu yerde, qırımtatar toylarında olğanı kibi, çoq oyun oldı.

Merasim Podgortsi köyünde «Tripolye» otel-restoran kompleksinde keçirildi.

Davet etilgenler arasında qırımtatar halqınıñ meseleleri boyunca Ukraina prezidentiniñ vekâletlisi Mustafa Cemilev, Ukraina halq deputatı Refat Çubarov, «Ukrainskaya pravda»nıñ baş muarriri Sevgil Musayeva, alıp barıcılar Vasilisa Frolova, Karolina Aşion, rejissör ve aktör Ahtem Seytablayev ve digerleri oldı. Bundan da ğayrı, Qırımdan kelgen musafirler de çoq oldı. Yırcınıñ doğmuş tatası Evelina toyğa Türkiyeden keldi.

Avdetniñ evel bildirgenine köre, Jamala aytqan edi ki, toy keçirmek içün eñ güzel yer Qırımdır.

Şimdiki vaqıtta Jamala ve Seit-Bekir Suleymanov Kiyevde Ukraina paytahtı belediyesi tarafından Jamalağa ediye etilgen dairedeniñ tamirinen oğraşa. «Bu işlerni Bekir idare ete, çünki bu meselelerni menden yahşı bile. Boynuna bunı alğanı içün oña minnetdarım», – dep ayttı Jamala bergen intervyularından birinde.

Susana Jamaladinovanıñ anası bildirdi ki, ana-babaları yaşlarğa para diye etti, olar, tamirni bitirsin dep.

«Arzum ömürge keçti», – dep ayttı yırcınıñ babası.

джамала никях2

Avdetniñ evel bildirgenine köre, aprel 26-da «Eurovision-2016» yarışınıñ ğalibi Jamala Seit-Bekir Suleymanovğa aqayğa çıqtı.

Nikâh merasimi Kiyev merkezindeki islâm medeniy merkezinde keçirildi. Bu yerge kelin-kiyevniñ soy-sopları keldi.

Jamala ve Seit-Bekirniñ arasındaki munasebetler aqqında 2016 senesi sentâbr ayında belli oldı, o vaqıt Susanna Camaladinova qısqa film Manhetten festivaline güzel yigitnen beraber keldi. Olar, Kiyevde keçirilgen qırımtatar merasimleriniñ birinde tanış oldı ve endi eki yıldan berli körüşeler. Yırcınıñ evel aytqanına köre, hususan Seit-Bekir onı «Eurovision» yarışında iştirak etmege çağırdı. «Sen ğalebe qazanırsıñ, çünki buña lâyıqsıñ», – dep paylaştı Jamala.

Seit-Bekir Suleymanov qırımtatar milliy areketi faali Sinaver Kadırovnıñ oğlu ola. O, Aqmescitte doğdı, Şevçenko adına Kiyev milliy universitetinde tibbiy radiofizika bölügini ve Kiyev iqtisadiyat mektebini bitirdi. Bunen beraber, o, cemaat erbabı ola.

Bundan evel Jamala añlattı ki, olarnıñ Seit-Bekir Suleymanov ile toyu Kiyevde yapılacaq, amma böyle merasim içün eñ güzel yer Qırım olur edi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası