Rusiye ükümeti «Qırım Cumhuriyeti, Altay ülkesi, Krasnodar ülkesi ve Stavropol ülkesinde kurort infrastrukturası inkişafı boyunca eksperiment keçirilüvi aqqında» qanun leyhasını tasdıqladı, vesiqağa binaen, 2018 senesi yanvar 1-den eksperiment şeklinde kurort alımı kirsetilecek.
Bu aqta Şimaliy Qavqaz işleri boyunca Nazirlikniñ matbuat hızmeti bildirdi.
Şimaliy Qavqaz işleri boyunca nazir Lev Kuznetsov bu qanun leyhasını cumaaqşamı künü Rusiye ükümeti toplaşuvında taqdim etti. Qanunnıñ esas maqsadı, turizm saasınıñ inkişafı, kurortlarnıñ saqlanuvı, yañıdan tiklenilüvi ve inkişafı içün şarait qurmaqtır.
«Qanun leyhasına binaen, 2018 senesi yanvar 1-den başlap, 2022 senesi dekabr 31-ge qadar Qırım Cumhuriyeti, Altay, Krasnodar ve Stavropol ülkelerinde kurort alımı kirsetilüvi boyunca eksperiment keçirilecek», – dep aytıla beyanatta.
Neticede qanun işke tüşürilmesi ve onıñ şekli boyunca qarar alınacaq.
Kuznetsovnıñ qayd etkenine köre, regionlarnıñ «kurort alımını» öz territoriyasında kirsetmek ya da kirsetmemek aqqı olacaq. Bundan da ğayrı, regionlar öz toprağında alım miqdarını belgiley. Qanun leyhası boyunca, bir kün içün eñ çoq 100 ruble alına bile.
Eksperiment keçirilgen topraqta yaşağan vatandaşlar kurort alımını tölemeycek.
Cıyılğan para kurort saası inkişafına sarf etilecek. Bunıñ içün mahsus kurort infrastrukturası inkişafı fondu teşkil etilecek.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Foto: İnterfaks
