Qırımtatar kişide keçirilgen tintüv vaqtında ğayıp olğan adamnıñ vesiqaları qıdırıldı

04.05.201713:18

Mayıs 4-te saba Aqmescitteki (Simferopol) Marşal Jukov soqağı rayonında yaşağan qırımtatar Tofik Abdulgaziyevde tintüv keçirildi.

Tintüv keçirilgen soñ Tofik Abdulgaziyev video muracaatında bildirdi ki, uquq qoruyıcılar onıñ evinde ğayıp olğan nasıldır insannıñ vesiqalarını qıdırdı.

«Bu insannen iç te alâqam yoq. Olar bir şey tapmadı. Bilgisayar ve telefonlarnı almadı. Nezaketnen davrandı, ayaqlarına papuçlar kiydi ve evge kirdi», – dep qayd etti aqay kişi.

Tintüv keçirilgen soñ Abdulgaziyev Ekstremizmge qarşılıq merkezine («E merkezi») yollanıldı.

«O, Ekstremizmge qarşılıq merkezine sanki sorğuğa çekilmek içün ketirildi. Bu, soñki aylar devamında onlarca memuriy protokollar tizgen organdır, bu protokollar boyunca adamlar üçten 12-15 künge qadar apiske qapatıla edi. Tofik Abdulgaziyev – bu, tintüv keçirilgen yerlerge daima kelgen bir adamdır. Yaqalanğanlar azat etilgende olarnı qarşılavlarda da faal iştirak etken edi, imkânına köre, er yerge kele edi», – dep ayttı adliyeci Kurbedinov.

Diger Qırım adliyecisi Edem Semedlâyevniñ bildirgenine köre, Tofik Abdulgaziyev nasıldır izaatlar, parmaq izlerini bermekni ve fotoresimge çıqmaqnı red etti.

«Añlağanıma köre, tintüv 2016 senesi iyün ayında qırımtatar Enver Memetovnıñ ğayıp oluvı boyunca açılğan cinaiy iş çerçivesinde keçirildi. Sualler ise umumiy edi: nasıl dinni kütesiñiz, qaysı camige barasıñız. Olarnıñ cedvelini kördim, o yerde çoq sual bar edi ve bunıñ içün 51-ci madde boyunca red ettik, çünki bu ne yerde ve nasıl qullanacağı belli degil», – dep añlattı adliyeci.

İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.


Фото аватара

Автор: Редакция Avdet

Редакция AVDET