«Hizb ut-Tahrir» işi boyunca yaqalanğan ve şimdiki vaqıtta SİZO-da bulunğan Arsen Cepparov tedaviylene ve özüne kele.
Bu aqta onıñ adliyecisi Cemil Temişev bildirdi.
Onıñ sözlerine köre, Cepparovğa künde eki kere antibiotik yapıla, bunıñ içün şişik aman-aman keçti. Baş ağrıları daa keçmedi, amma endi o qadar şiddetli degil.
«Onıñ güzel körüngenini aytıp olamayım. Amma yahşı deñişmeler bar. Ümüt etem ki, onı yahşı etip tedaviyletecekler», – dep yazdı Temişev.
Avdetniñ bildirgenine köre, bundan evel Cemil Temişev Arsen Cepparovnıñ Aqmescit SİZO-sı tibbiy hadimleri tarafından baqılmasını talap etip, bunı yaptırdı. Arsenniñ bedeninde daima şişikler peyda ola. Cepparovnıñ yaqınları ayta ki, ondan irin çıqa.
«Hizb ut-Tahrir» işi boyunca Yaltadaki Qızıltaş (Krasnokamenka) köyünde yaqalanğan Arsen Cepparov ve Refat Alimov apiste 2016 senesi aprel 18-den başlap buluna.
Rusiye Yuqarı mahkemesi «Hizb ut-Tahrir» teşkilâtını yasaq etti ve «terroristik» tanılğan 15 birleşme cedveline kirsetti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
