Frenkistan vatandaşları yañı prezidentni sayladı

08.05.201713:45

Frenkistannıñ yañı başı «Ögge» areketiniñ yetekçisi, devletniñ sabıq iqtisat naziri Emmanuel Makron oldı.

Şimdiki vaqıtqa qadar bülletenlerniñ 99,99%-ı (35,4 million) işlep baqıldı. Makronğa saylayıcılarnıñ 66,06%-ı rey berdi, onıñ raqibi – «Milliy front» firqasınıñ yetekçisi Marin Le Pen içün ise, reylerniñ 33,99%-ı berildi, dep bildire «RİA Novosti».

Beşinci cumhuriyette prezident saylavları 11-ci sefer keçirildi. Devlet yolbaşçısı beş yılğa, doğru sırlı umumiy rey berüv usulınen saylanıla. Saylavlarda 18 yaşını toldurğan vatandaşlar (tahminen 47 million saylayıcı) iştirak ete bile. Sabıq prezident Fransua Ollanddan evel bu eñ yüksek devlet vazifesinde Şarl de Goll, Jorj Pompidu, Valeri Jiskar d’Esten, Fransua Mitteran, Jak Şirak ve Nikolâ Sarkozi bulunğan edi.

Makron devletniñ yañı tarihında Frenkistannıñ eñ genç prezidenti oldı – o, 39 yaşında. Emmanuel Makron Frenkistannıñ eñ prestij oquv yurtlarınıñ biri olğan Sciences-Po Paris Siyasiy tedqiqat institutını, soñra ise, frenk siyasiy elitasınıñ kadr çıqarıcısı olğan ENA Milliy memuriyet mektebini bitirdi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası