Qırımtatar sportçuları yunan-rom küreşi boyunca çempionatta «altın» ve «kümüş» qazandı

10.05.201712:50

Adıgeya paytahtı Maykopta mayıs 5-8 künleri Cenübiy federal okrugınıñ yunan-rom küreşi boyunca çempionatı keçirildi. Qırım cıyma taqımı bütün mükâfatlarnı aldı – «tunçtan» «altınğa» qadar.

Qırım Cumhuriyeti Sport küreşi federatsiyasınıñ malümatına binaen, yükü 59 kilogrammğa qadar olğan sportçular kategoriyasında Sudaqtan kelgen halqara seviyedeki sport ustası Lenur Temirov ğalebe qazandı.

Daa bir Sudaq sakini, halqara seviyedeki sport ustası Edem Saliyev yükü 66 kilogrammğa qadar olğan sportçular kategoriyasında «kümüş» qazandı. Yükü 75 kilogrammğa qadar olğan sportçular kategoriyasında Aluştalı Artur Stepanân üçünci yerni aldı.

Cenübiy federal okrugı çempionatınıñ bütün ğalipleri ve mükâfatqa nail olğan iştirakçileri iyün 15-17 künleri Vladimirde keçirilecek Rusiye çempionatında iştirak etecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.