Mayıs 11-de Aqmescit (Simferopol) Jeleznodorojnıy mahkemesi «Qırım diversantları» işi boyunca yaqalanğan Redvan Suleymanovnıñ apiste bulunma müddeti avgust 9-ğa qadar devam ettirdi. O, Qırımda naqliye obyektlerinde bomba olğanı aqqında yalan malümatnı bildirgeninen qabaatlana.
«Ne taqiqat, ne de qabaatlav tarafı Suleymanov qaçıp, delillerni yoq ete bilgeni ve mahkeme keçirilmesine mania ola bilgeni aqqında iç delil ketirmedi. Şimdiki vaqıtta (Aqmescitteki, – Avdet) Kiyev rayon mahkemesiniñ işke tüşürilgen eki bir-birine zıt kelgen qarar bar. Olardan biri – qabaatlavnıñ şefaat arizasını qanaatlendirmemek. Kelecek kün, men on künge yaqalağanımda, aynı mahkemeci daa bir qarar çıqardı ki, işke tüşürilgen eski qararnıñ bar olğanına baqmadan, Suleymanovnı apiste qaldırmaq muracaatını qanaatlendirmek», – dep mahkemeniñ bugünki qararına izaat berdi Suleymanovnıñ adliyecisi Emil Kurbedinov.
Bundan evel haber etilgenine köre, «Qırım diversantları» işi boyunca yaqalanğan Redvan Suleymanov mahkemede qabaatını tanıdı, lâkin, büyük zarar ketirgeni aqqında oña taqdim etilgen qabaatlavğa razı olmadı.
«Ukrain diversant taqımında» iştirak etkeninen qabaatlanğan Redvan Suleymanov Aqmescit Taqiqat izolâtorında buluna, onıñ işi boyunca taqiqat alıp barıla, dep bildire «Qırım.Aqiqat».
Kütleviy haber vastaları, FSB malümatına esaslanıp, bildirdi ki, o, iyül 30-da Aqmescit ava limanı territoriyasında yaqalandı. FSB tarafından paylaşılğan videoda 1989 senesi doğğan Zaporojyeli Redvan Suleymanov bildirdi ki, onı ukrain istihbaratı 2015 senesi oktâbr ayında celp etti. Oña sanki Aqmescit ava limanı va avtovokzalında patlatıcı aletlerniñ qoyulması içün yerlerni tapmaq vazifesi buyurılğan. Bunen beraber, o, rusiyeli arbiy bazalar aqqında malümat cıymaq kerek edi.
Aynı vaqıtta Meclis (Rusiye Federatsiyasında 2016 senesi aprel 26-da qabul etilgen qararınen yasaqlanğan) yolbaşçısı Refat Çubarov haber etti ki, Redvan Suleymanov, diversantlar dep adlandırılğan kişiler yaqalanğanından üç afta evel tutuldı. Onıñ soy-sopları Suleymanovnıñ yaqalanması aqqında bilgen, amma haber etmege qorqqan edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
