Qırımtatarnıñ evinde keçirilgen tintüv ğayıp olğan adamnen bağlı edi

11.05.201714:10

Riza İzetovnıñ evinde keçirilgen tintüv ve onıñ sorğuğa çekilmesi 2016 senesi ğayıp olğan Enver Memetovnen bağlı edi, o, aydut taqımını teşkil etüvnen şeklenile.

Bu aqta «Radio Svoboda» mühbiri Anton Naumlük bildirdi.

«İzetov taqiqatçınıñ suallerine cevap bermekni red etti, oña adliyeci öyle de yiberilmedi. Tintüv keçirilgen vaqıtta ondan planşet ve telefon alındı, bularnı ekspertizadan soñ oña qaytaracağını vade ettiler», − dep yazdı mühbir.

Qayd etmek kerek ki, Aqmescit (Simferopol) sakini Tofik Abdulgaziyevniñ evinde keçirilgen tintüv aynı meselenen bağlı edi. Anton Naumlükniñ malümatına binaen, ğayıp olğan Memetovnıñ işinen bağlı tintüvler daa çoq oldı, amma olarnıñ iştirakçileri bu aqta bildirmege qorqa.

Avdetniñ evel bildirgenine köre, mayıs 11-de saba Qırım uquq qoruyıcıları Aqmescit civarındaki Mamaq (Strogonovka) qasabasında yaşağan Riza İzetovnıñ evinde tintüv keçirdi.

Faal Lutfiye Zudiyevanıñ malümatına binaen, bu, İzetovnıñ uquq qoruyıcılarnen endi dörtünci «körüşüvidir». 2015 senesi iyün ayında onı belli olmağan, urbalarında tanıtma işaretleri olmağan silâlı şahıslar yaqaladı ve Federal havfsızlıq hızmeti Qırım idaresi binasına alıp ketti. O vaqıt oña qol tutmaq içün 12 adam keldi, olarğa nisbeten memuriy protokollar tizildi. 2017 senesi fevral ayında İzetov, bir qaç qırımtatar kişinen beraber, Boğurçada (Kamenka) Marlen Mustafayevniñ evinde tintüv keçirilgen vaqıtta oña qol tutmaq içün kelgeni içün 5 kün memuriy yaqalavnen cezalandı. Bir ay keçken soñ, mart ayında, o, Rusiye İçki işler nazirliginiñ Ekstremizmge qarşılıq merkezi («E» merkezi) hadimleri tarafından kene de yaqalandı,  çünki faal Remzi Bekirovğa qol tutmağa keldi. O, yazılı şekilde sorğuğa çekildi ve azat etildi.

Evel haber etilgenine köre, mayıs 8-de Qapsihor (Morskoye) köyü sakini Yusuf Toroznıñ evinde tintüv keçirildi. Bunıñ sebebi, onıñ narkotik işlep çıqarğanında şeklenilüvi oldı. Ev saibiniñ oğlu Server Toroz tintüvden soñ Krasnodar ülkesine alıp ketirildi, oña nisbeten cinaiy iş açıldı.

Bundan evel Sudaq rayonındaki Qapsihor (Morskoye) ve Qutlaq (Veseloye) köylerinde politsiya hadimleri qırımtatar evlerinde reyd keçirdi. Bundan da ğayrı, anonim mektüp boyunca qırımtatar milliy areketi faali İlver Ametovnıñ evinde de tintüv keçirildi. O yerde uquq qoruyıcılar silâ ve narkotik qıdırdı. Ametovnıñ oğlu tintüv keçirilgen soñ Aqmescitke (Simferopol) alıp ketirildi, lâkin soñra azat etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET