Keriçteki sarı-mavı tüsteki çöplük urnaları Qırım Cumhuriyeti yolbaşçısı Sergey Aksönovnı açuvlattı. O, olarnıñ «devletke qarşı tüste» olğanını ayttı ve yerli akimiyetni böyle tüslerni qullanğanı içün 5 mln ruble para cöremesinen cezalamağa teklif etti.
«Devletke qarşı olğan tüsteki urnalarnı kördiñizmi? Bunıñ içün 5 million ruble para cöremesi olmaq kerek. Ekologiyanı bozuv ve estetikanı aqaretlev içün», – dep ayttı Aksönov.
Cumhuriyet yolbaşçısı bugün Keriçke yerli plâjlarnıñ turistik mevsimine azırlığını teşkermek içün kelgen edi. Yerli akimiyet onıñ ziyaretine azırlamağa yetiştirdi. Meselâ, eñ yaramay yollardaki çuqurlarnı topraq ve asfaltnen toldurdılar.
Keriç civarındaki Geroyevskoye köyünde Aksönov yerli sakinlernen körüşti. Olar cumhuriyet yolbaşçısına öz meselelerini añlattı. Adamlar suv, gaz ve bağ yoq olğanına, paalı internet ve şahsiy şifahane tarafından soqaqnıñ qapatılmasına şikâyet etti. Aksönov bütün meselelerni çezecegi aqqında söz berdi, dep bildire «Kerch.FM».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
