Mayıs 18-de Herson vilâyetindeki Geniçesk rayonında qırımtatar halqınıñ sürgünligine bağışlanğan bir sıra merasimler keçirilecek.
Bu aqta Geniçesk rayon devlet memuriyeti yolbaşçısınıñ muavini, Qırımtatar milliy meclisi (Rusiye Federatsiyasında 26.04.2016 s. yasaq etilgen) azası Gulnara Bekirova bildirdi.
Onıñ sözlerine köre, aktsiyalarnıñ teşkiliy ve azırlıq işlerinde yerli memuriyet ve qırımtatar meclisleri iştirak ete.
Sürgünlik qurbanları hatıra künü arifesinde rayonnıñ tasil müessiselerinde bu mevzuğa bağışlanğan merasimler keçirilecek: sergiler, hatıra aqşamları ve ilâhre. Mayıs 18-de saat 11:30-da qırımtatarlar toplu yaşağan köy ve qasabalarda matem mitingleri başlanacaq.
Saat 12:00-de olarnıñ iştirakçileri «Qaar ve birdemlik» Bütün Ukraina aktsiyasına (sükünet daqqası, avtomobillerniñ sesleri, mektep çañları) qoşulacaq. Bundan soñ, saat 13:00-te Geniçeskteki «Ukraina» kinoteatrı yanında matem mitingi keçirilecek. Bundan soñ, matem aktsiyalarınıñ iştirakçileri Geniçeskten Çonğarğa qadar avto yürüşni teşkil etecek. Ve saat 16:00-da «Çonğar» nezaret-keçirüv noqtası yanında da matem mitingi keçirilecek.
Yerli meclislerniñ malümatına binaen, Herson vilâyetinde 10 biñden ziyade qırımtatar yaşay, olarnıñ eñ büyük toplu yaşağan qasabaları Geniçesk rayonında yerleşe, dep bildire «Qırım.Aqiqat».
Mayıs 18-de Ukrainada hatıra merasimleri keçirilecek. Er sene bu kün 1944 senesiniñ facialı vaqialarına, yani Qırımnıñ tamır halqı yarımadadan Orta Asiyağa sürgün etilgenine bağışlanğan hatıra merasimleri teşkil etile. Umumen olaraq, 180 biñden ziyade adam sürgün etildi. Ukrainada qırımtatar halqı sürgünliginiñ genotsid olğanı tanıldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
