Sankt-Peterburg şeerinde belli qırımtatar ekimine bağışlanğan abide tiklenildi (VİDEO)

14.05.201716:46

Sankt-Peterburg şeerindeki Mariya Magdalina adına 2 sanlı bala hastahanesiniñ bağçasında «Ocağa» adlı abide – Girey Ali oğlu Bairovğa bağışlanğan abide peyda oldı. O, tibbiyet ilimleri doktorı, Sovet Sotsialistik Cumhuriyetleri Birligi Tibbiyet ilimleri akademiyası azası, tek Peterburgda degil de, bütün ülkede bala cerrahiyatı (hirurgiya) mektebiniñ tesisçisi ola.

Şimdiki vaqıtta bu hastahanede Girey Bairovnıñ oğlu Ali Bairov baş ekim olıp çalışa. Musafirlerge muracaat etip, o, bu yer babasınıñ evi olğanını ayttı:

«Bu, Girey Aliyeviç tarafından 1968 senesi yañıdan açılğan birinci hastahane edi. Bunıñ içün abide bu yerde açıldı. O, evine qayttı», – dep ayttı Bairov.

Açılış merasiminde Peterburg yeparhiyası, akimiyet temsilcileri, bunen beraber, zemaneviy yerli tibbiyet ustaları, bala cerrahiyatı saasındaki yetekçi mütehassıslar, kadetler, arbiy çalğıcılar taqımı iştirak etti.

Qayd etmek kerek ki, Girey Bairovnıñ kiçik oğlu Vladimir de sağlıq saqlav saasında çalışa, şimdiki vaqıtta o, perinatal Merkeziniñ klinikasında inkişaf qusurı bala cerrahiyatı boyunca ilmiy-araştırma laboratoriyasınıñ müdiri ola, dep bildire FAN-TV.

Girey Ali oğlu Bairov 1922 senesi aprel 2-de Aluştada, mektep ocası Ali Memet oğlu Bairov ve onıñ apayı Lidiya İvanovna İgnatoviçniñ qorantasında doğdı. Bairovnıñ qartbabalarınıñ biri – Memet Bairov – uyezd ekimi, digeri ise – İvan İgnatyeviç İgnatoviç – Tibbiyet-cerrahiyat akademiyasınıñ mezunı, kollej mesleatçısı edi, Opoçka şeerinde ekim olıp çalıştı ve aynı vaqıtta Şeer Duması azası edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Али Баиров
Али Баиров

Author: Редакция Avdet

Avdet gazetası