Refat Çubarov Ahtem Çiygoznıñ işi boyunca şaat olaraq sözde bulunmaq içün Qırımğa kelecek ola

15.05.201715:40

Qırımtatar Milliy Meclisi (Rusiye Federatsiyasında 26.04.2016 mahkeme qararlarınen yasaq etilgen) reisi, Ukraina halq deputatı Refat Çubarov Meclis reisiniñ muavini Ahtem Çiygoznıñ işi boyunca mahkemede sözde bulunmaq içün Qırımğa kelmege niyetlene.

Bu aqta o, mayıs 15-te Kiyevde keçirilgen matbuat konferentsiyasında bildirdi.

Çubarov oquğan beyanatında Qırım Yuqarı mahkemesiniñ toplaşuvına şaat olaraq çağıruvğa razılıq bere. O, vesiqanı Ahtem Çiygoznıñ adliyecisi Nikolay Polozovğa onıñ mayıs 19-da Kiyevge kelgende teslim etecek ola.

«Bu iş boyunca obyektiv deliller ketirebileceklerden biri olam. Rusiye qanunlarına (Rusiye Cinaiy kodeksiniñ 456-cı maddesi, – Avdet) binaen, maña Qırımda bulunacağım vaqıt immunitet berilmek kerek. Bu, olar meni mahkemege resmiy şekilde çağırsa, olmaq kerek», – dep qararına izaat berdi Çubarov, bildire «Qırım.Aqiqat».

Adliyeci Nikolay Polozovnıñ fikrince, Refat Çubarovnıñ «Çiygoznıñ işi» boyunca sorğuğa çekilmesi rusiyeli adliye menfaatlarına kire ve ömürge keçirile bile.

«O (Refat Çubarov, – Avdet), fevral 26 vaqialarınıñ esas iştirakçisi ola. Onı er bir zararlanğan şaat ayta: o, anda bulunğan edi, dep. O, kerçekten de, müim deliller ketire bile. Bunıñ içün, adliyege esaslanacaq olsaq, böyle şaatnı, kerçekten de, ketirmek ve diñlemek kerek», – dep ayta Polozov.

Onıñ sözlerine köre, Çubarov maniasız Qırımda 15 kün devamında buluna bilecek.

«Mesele şunda ki, 456-ci maddeniñ cinaiy-usul kodeksi boyunca, şaat ecnebiy memlekette bulunsa, mahkeme Adliye nazirligi vastasınen bu devletniñ uquq qoruyıcı organlarına muracaat ete bile ve şaatnıñ, onıñ dava ceryanında iştirak etmesi içün, ketirilmesini teminley bile. Bundan da ğayrı, şaatnıñ 15 kün devamında er türlü taqip etilüvinden immuniteti bar», – dep ayttı Polozov.

Avdetniñ evel bildirgenine köre, Ahtem Çiygoz 2014 senesi fevral 26-da Qırım Yuqarı Radası binası yanında mitingde iştirak etkeni içün 2015 senesi yanvar ayında yaqalandı. O vaqıt miting iştirakçilerine qarşı Rusiye tarafdarları olğan faaller, bu cümleden, «Russkoye Yedinstvo» firqasınıñ temsilcileri, çıqtı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.