Qırım parlamenti spikeriniñ muavini Remzi İlyasov Ukraina tarafından şahsiy sanktsiyalar kirsetilgen şahıslar cedveline kirdi.
Alâqalı ferman Ukraina prezidenti Petro Poroşenko tarafından imzalandı.
Böyleliknen, İlyasovğa nisbeten nevbetteki sanktsiyalar kirsetildi: 1) aktivlerniñ blok etilüvi; 2) Ukraina tışına kapital ayırılmasınıñ toqtatıluvı; 3) diger sanktsiyalar (maliyeviy ameliyatlarnıñ toqtatıluvı).
Prezident Petro Poroşenkonıñ alâqalı fermanı mayıs 16-da devlet yolbaşçısınıñ saytında yerleştirildi. Eki cedvel aman-aman 700 saifeden ibaret. Cedvellerge siyasiy firqalar yetekçileri, parlamentariyler ve memurlar, bunen beraber, mühbirler, medeniyet erbapları, saylav komissiyalarınıñ hadimleri kirsetildi.
Poroşenkonıñ sanktsiyalar boyunca birinci fermanı 2015 senesi çıqarıldı. O vaqıt cedvelde 400 soyad ve tahminen 100 uquqiy şahıs bar edi. 2016 senesi sanktsiyalar uzattırıldı. Şimdi cedvel daa büyük oldı.
Avdetniñ evel bildirgenine köre, Ukraina prezidenti Petro Poroşenko Rusiyege qarşı sıñırlatma tedbirlerini işke tüşürdi, neticede devlette bir sıra rusiyeli internet-resurslarğa kiriş blok etilecek.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
