Prokuratura Zeytullayevniñ apiste bulunma müddetini 17 yılğa devam ettirmege kene de talap ete

17.05.20178:52

Rusiye prokuraturası Rusiye Yuqarı mahkemesine «Hizb ut-Tahrir» işi boyunca Aqyarda (Sevastopol) yaqalanğan Ruslan Zeytullayevniñ davası boyunca Şimaliy Qavqaz arbiy okrug mahkemesiniñ qararına qarşı apellâtsion arizasını yolladı.

«Radio Svoboda» mühbiri Anton Naumlükniñ haber etkenine köre, prokuraturada bildirdiler ki, «işbu cinayet içün belgilengen cezanıñ daa yımşaq şekli tek ayrı şaraitte ola bile», amma, devlet qabaatlavınıñ fikrince, böyle şarait bu vaziyette yoq.

Avdetniñ evel bildirgenine köre, aprel 26-da Şimaliy Qavqaz okrug arbiy mahkemesi «Hizb ut-Tahrir» işi boyunca yaqalanğan Ruslan Zeytullayevni Rusiye Federatsiyası Cinaiy kodeksiniñ 205.5 maddesi 1-ci qısmı (Rusiyede terroristik tanılğan teşkilâtnıñ faaliyetini teşkil etüv) boyunca qabaatlı olğanını tanıdı ve onı qattı nizam koloniyasında bulunma şartınen 12 yılğa apiske qapatmaq qararını çıqardı.

Aprel 4-te Zeytullayev, qırımtatarlarnıñ taqip etilmesini toqtatmaq ve çıqarılğan mahkeme qararlarını lâğu etmekni talap etip, açlıq ilân etti. Mayıs 15-te Ruslan Zeytullayev Rostov-na-Donu şeerindeki SİZO-da yañıdan müddetsiz açlıq ilân etti.

Prokuror Gennadiy Truhanov Ruslan Zeytullayevni Rusiyede yasaq etilgen «Hizb ut-Tahrir» teşkilâtında iştirak etkeni içün qabaatlav boyunca 17 yılğa apiske qapatmağa talap etken edi. Ruslan Zeytullayev qabaatını tanımadı, onıñ imayesi mahkemeden onı, areketlerinde cinayet olmağanı içün, azat etmege talap etti.

Ruslan Zeytullayev 2015 senesi yanvar ayında Aqyar (Sevastopol) rayonında «Hizb ut-Tahrir» teşkilâtınıñ bölügini teşkil etkeninde şeklenilip yaqalandı. Onen beraber Ferat Sayfullayev, Rustem Vaitov ve Nuri Primov yaqalandı, taqiqat olarnı yasaq etilgen teşkilâtnıñ iştirakçileri olğanını ayttı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası