Mayıs 18-de Qırım camilerinde qırımtatar halqı sürgünlik qurbanlarınıñ ruhlarına dua etildi.
Aqmescit (Simferopol) merkeziy Kebir camisinde keçirilgen dua merasimine eki yüzden ziyade musulman keldi, dep bildire Qırım müftiyatınıñ matbuat hızmeti.
Mayıs 18-de, qırımtatarlarnen birdemlik olğanını köstermek içün, Qırımnıñ bütün din konfessiyalarınıñ temsilcileri de, öz diniy adetlerine köre, ibadetnahelerinde dua etti.
Avdetniñ evel bildirgenine köre, mayıs 18-de qırımtatarlar yarımadanıñ çeşit köşelerinde sürgünlik qurbanlarını añdı.
Hatırlatamız ki, Ukraina şeerlerinde, bunen beraber dünyanıñ diger şeerlerinde de, mayıs 18-de 1944 senesi qırımtatar halqınıñ sürgünlik qurbanları hatırasına bağışlanğan merasimler keçirildi. Bu kün adamlar 1944 senesi yüz bergen vaqialarnı hatırladı, o vaqıt Qırımnıñ tamır halqı yarımadadan Orta Asiyağa sürgün etildi. Umumen olaraq, 180 biñden ziyade adam sürgün etildi.
Avdetniñ haber etkenine köre, Mayıs 18-de Kanada paytahtı Ottavada 1944 senesi qırımtatar halqınıñ sürgünlik qurbanlarınıñ hatırasına, bunen beraber, Qırımda yaşağan qırımtatarlarnen birdemlik olğanını köstermek içün qırımtatar bayrağı tiklenildi.
Foto: QMDİ
İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
