Qırımtatar faali Ahtem Çiygoz Ukraina halq deputatı Refat Çubarov ile 2014 senesi fevral 26-da mitingni teşkil etüv meselesini muzakere etmegen edi.
Bu aqta Qırım mahkemesinde «Çiygoznıñ işi» boyunca şaat olaraq keçken Abduraman Egiz bildirdi.
Egizniñ malümatına binaen, fevral 26-da Qırım parlamenti yanında piket keçirilecegi aqqında qarar alınğan Qırımtatar Milliy Meclisi (Rusiyede 26.04.2016 mahkeme qararlarınen yasaq etilgen) toplaşuvından soñ Refat Çubarovnıñ kabinetinde kütleviy merasimni azırlav içün mesüliyetli olğanlar toplaştı, dep bildire «Qırım.Aqiqat».
Egiz olarnıñ arasında Milletlerara munasebetler ve sürgün etilgen vatandaşlarnıñ meseleleri boyunca Qırım Devlet komitetiniñ yolbaşçısı Zaur Smirnovnıñ bulunğanını ayttı. Ahtem Çiygoz ise, şaatnıñ bildirgenine köre, o toplaşuvğa qalmadı.
Ahtem Çiygoz 2014 senesi fevral 26-da Qırım Yuqarı Radası binası yanında mitingde iştirak etkeni içün 2015 senesi yanvar ayında yaqalandı. O vaqıt miting iştirakçilerine qarşı Rusiye tarafdarları olğan faaller, bu cümleden, «Russkoye Yedinstvo» firqasınıñ temsilcileri, çıqtı.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
