Qırım mahkemesi Çubarovnı «Çiygoznıñ işi» boyunca sorğuğa çekmek içün çağırmaq qararını qabul etmege daa azır degil

23.05.20179:37

Qırım Yuqarı mahkemesi Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi Refat Çubarovnı qırımtatar faali Ahtem Çiygoznıñ işi boyunca sorğuğa çekmek içün çağırmaq qararını qabul etmekten vazgeçti.

Adliyeci Nikolay Polozovnıñ qayd etkenine köre, mahkeme bu mesele boyunca «talimat almaq içün» teneffüs yaptı, dep, bildire «Qırım.Aqiqat».

«İmaye Refat Çubarovnıñ şaat olaraq (Rusiye, – Avdet) cinaiy-usul kodeksiniñ 456-ci maddesi boyunca, oña immunitet berilmesi ile, sorğuğa çekilmesi aqqında şefaat arizasını berdi. Lâkin, mahkeme, şefaat arizalarını diñlep, iç qarar almadı. Bunı, şaatnıñ sorğuğa çekilmesi başlanğanı aqqında endi ilân etilgen edi, dep añlattı. Menim fikrim şu ki, er alda, mahkemeciler, böyle etip, qarar aluv meselesinde teneffüs yapmağa tırıştı. Belki, yuqarıdakiler, belki, siyasiy reberler ile tevsiyeleşmek, reberlerden talimat almaq içün», – dep ayta Polozov.

Adliyeci qayd etti ki, Refat Çubarovnıñ Qırımğa çağırılması içün uquq tarafından iç manialar yoq.

Avdetniñ evel bildirgenine köre, mayıs 15-te Refat Çubarov qırımtatar faali Ahtem Çiygoznıñ işi boyunca mahkemede sözde bulunmaq içün Qırımğa kelmege azır olğanını ilân etti.

Qırım sabıq prokurorı, Rusiye Devlet Duması deputatı Natalya Poklonskaya ilân etti ki, o, Qırımda Refat Çubarovnı, yarımadağa kelse, şahsen qarşılamağa azır.

Ahtem Çiygoz 2014 senesi fevral 26-da Qırım Yuqarı Radası binası yanında mitingde iştirak etkeni içün 2015 senesi yanvar ayında yaqalandı. O vaqıt miting iştirakçilerine qarşı Rusiye tarafdarları olğan faaller, bu cümleden, «Russkoye Yedinstvo» firqasınıñ temsilcileri, çıqtı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET