Aqmescit (Simferopol) memuriyeti yolbaşçısı Gennadiy Baharev merkez şeer meydanınıñ tamirlenüvi çerçivesinde Vladimir Leninniñ abidesini başqa yerge qoymaq tekliflerini baqmağa yasaq etti.
Baş şeer mimarı İrina İvanovanıñ qayd etkenine köre, meydannıñ tamirlenüvi boyunca çeşit teklifler kele, bazılarında Lenin abidesiniñ başqa yerge qoyulması, bu yerde ise şadırvan yapılması teklif etile.
«Leninni tiymek mümkün degil. Bu, bizim tarihımızdır. Bu, siyasiy bir meseledir, bunıñ içün keskin areketler etmeñiz, aytmañız bile. Bu, tevsiye. Leninni tiymek, demek ki, başqa yerge qoymaq da, mümkün degil», – dep bildire Baharevniñ sözlerini «Krıminform».
Meydan tamirlenüvi leyhası sene soñunda azır olacaq.
Foto: Avdet
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
