Bir yıl evel qaçırılğan qırımtatar faali Ervin İbragimovnıñ evinde mayıs 24-te aqşam dua merasimi keçirile.
Yarımadanıñ çeşit köşelerinden onlarca adamlar kelip, Ervinniñ evge qaytması, bunen beraber, qanunsız yaqalanğanlarnıñ azat etilmesi içün dua etti.
Dua başlanmazdan evel qırımtatar milliy areketi iştirakçisi İlmi Umerov vatandaşlarına muracaat etip, sözde bulundı.
Kiyevde ise, «KrımSOS» teşkilâtı Ukrainada Rusiye elçiligi yanında aktsiya keçirecek.
Mayıs 24-te Bağçasarayda qırımtatar milliy areketi faali, Bağçasaray şeer şurasınıñ sabıq deputatı, regional meclis azası, Bütün dünya qırımtatar kongressiniñ İcra şurası azası Ervin İbragimov ğayıp oldı. Onıñ maşnası onıñ yaşağan evi yaqınlarında açıq turğan tapıldı. Ğayıp olğan, babasına aytqan edi ki, 36-cı region 350 sanlı Shkoda Octavia A 6 onı nezaret ete.
Ervin İbragimovnıñ tutulğanını onıñ evi yanındaki tükânda yerleştirilgen video nezaret kameraları qayd etti. Videoda körüne ki, Yol-patrul hızmeti hadimleri urbasındaki belli olmağan şahıslar gençni tutıp, onı beyaz renkli Ford Tranzit avtomobiline oturttı.
Bağçasaray faalleri, bunen beraber, qırımtatar faali Ervin İbragimovnıñ soy-sopları ve dostları qıdıruvnı teşkil etti. Ğayıp olğannıñ yaqınları Ervin İbragimov içün 1 million ruble mükâfat bermege azır olğanlarını bildirdi.
İyün 1-de Bağçasaraydaki «Arpat» restoranı yanında qaçırılğan Ervin İbragimovnıñ pasportı ve iş kitabı tapıldı.
İyül 17-de qırımtatar faali Ervin İbragimovnıñ doğğan künü munasebetinen dua keçirildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
