Mahkeme Çubarovnı Çiygoznıñ işi boyunca imayeniñ şartlarınen sorğuğa çekmekni red etti

24.05.20179:10

Qırım Yuqarı mahkemesi Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi Refat Çubarovnı, oña immunitet berilmesi şartınen, «Çiygoznıñ işi» boyunca sorğuğa çekmek içün çağıruv aqqında imaye tarafınıñ şefaat arizasını qanaatlendirmedi.

«Mahkemeciler taqımı qarar çıqardı ki, şaatnıñ Rusiye Federatsiyası cinaiy-usul kodeksiniñ 456-ci maddesi boyunca davet etilüvi aqqında imayeci Polozovnıñ (Ahtem Çiygoznıñ adliyecisi, – Avdet) şefaat arizasını qanaatlendirmedi, çünki imayeci mahkemeniñ qayd etilgen şahısnı şaat olaraq belgilengen şekilde celp etmesi içün esaslanabilecek şaraitni kerekli qadar belgilemedi», – dep bildire Krıminform mahkeme temsilcisi Maryana Pavlovskayanıñ sözlerini.

Nikolay Polozov qayd etti ki, Çubarov «fevral 26» işi boyunca esas şaat ola. Adliyeciniñ sözlerine köre, diger delillerde de (şaat ve zararlanğanlarnıñ izaatlarında, videolarda) oña ayrı diqqat berile.

«Sorğuğa çekilgen yüzge yaqın şaat ve zararlanğan kişi onıñ o vaqialarnıñ faal iştirakçisi olğanını ayta, mahkeme Refat Çubarovnıñ areketlerini köstergen onlarca videolarnı seyir etti. Başqaca aytsaq, davada Refat Çubarovdan daa da müim şahıs yoqtır. Ve vazife, kerçekten de, cinaiy işniñ obyektiv ve bütün taraflı baqılması olsa, Refat Çubarov onıñ çerçivesinde sorğuğa çekilmek kerek», – dep ayttı adliyeci.

Avdetniñ evel bildirgenine köre, mayıs 15-te Refat Çubarov qırımtatar faali Ahtem Çiygoznıñ işi boyunca mahkemede sözde bulunmaq içün Qırımğa kelmege azır olğanını ilân etti.

Hatırlatamız ki, şimdiki vaqıtta rusiyeli uquq qoruyıcılar Çubarovğa nisbeten Rusiye Federatsiyasınıñ topraq bütünligini bozmaq çağıruvlar aqqında madde boyunca cinaiy işni baqa. 2015 senesi oktâbr ayında Qırımda mahkeme Çubarovnıñ ğıyabiy şekilde yaqalanuvı aqqında qarar çıqardı, bundan soñ o, halqara qıdıruvğa ilân etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.