Mayıs 25-te Qırım Yuqarı mahkemesiniñ «Çiygoznıñ işi» boyunca nevbetteki toplaşuvında imaye tarafınıñ şaatlarını diñlemege devam ettiler.
Üylege qadar mahkeme eki şaatnı sorğuğa çekti, olarnıñ ekisi de tasdıqladı ki, Ahtem Çiygoznıñ 2014 senesi fevral 26-da keçirilgen mitingde areketleri barışıq edi.
Bu aqta Çiygoznıñ adliyecisi Nikolay Polozov bildirdi.
«Şaat kösterdi ki, o, kün devamında bayağı vaqıt Ahtem Çiygoz yanında bulundı. O, Ahtem Çiygoznıñ nasıldır qanunsız areketlerge, zorbalıq areketlerine çağırğanını körmedi, «Ur!», «Bas!» degen sözlerini eşitmedi. Bundan da ğayrı, o, Ahtem Çiygoznıñ adamlarnı toplağanını, olarğa nasıldır emirler bergenini ve bu adamlar soñra bu emirlerni miting iştirakçilerine bildirgenlerini körmedi», – dep qayd etti Polozov.
Bu şaatnıñ sözlerine köre, o, uquq qoruyıcı organları Qırım Yuqarı Radasınıñ iç azbarını terk etken soñ Rusiye tarafdarları olğan miting iştirakçileriniñ közyaş peyda etken gaznı qullanğanını kördi, dep bildire «Qırım.Aqiqat».
Mayıs 25-te sorğuğa çekilgen imaye tarafınıñ ekinci şaatı qoştı ki, militsiya hadimleri Rusiye tarafını tutqan miting iştirakçileriniñ provokatsiya areketlerini körmemezlikke urğan edi, bunen beraber, Ahtem Çiygoznıñ areketlerinde tecavuz olmadı.
«O, kösterdi ki, o, Ahtem Çiygoznı kördi, amma yaqından degil de, uzaqtan. O, Ahtem Çiygoznıñ tecavuz ya da zorbalıq areketlerine çağırğanını körmedi. Aksine, o, adamlarnı tınçlandıra edi, ellerini köterip olarğa sallay edi, olar tınç olsun ve biraz artqa keçsin dep», – dep qayd etti Polozov.
Avdetniñ evel bildirgenine köre, Qırım Yuqarı mahkemesi Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi Refat Çubarovnı, oña immunitet berilmesi şartınen, «Çiygoznıñ işi» boyunca sorğuğa çekmek içün çağıruv aqqında imaye tarafınıñ şefaat arizasını qanaatlendirmedi.
Ahtem Çiygoz 2014 senesi fevral 26-da Qırım Yuqarı Radası binası yanında mitingde iştirak etkeni içün 2015 senesi yanvar ayında yaqalandı. O vaqıt miting iştirakçilerine qarşı Rusiye tarafdarları olğan faaller, bu cümleden, «Russkoye Yedinstvo» firqasınıñ temsilcileri, çıqtı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
