Emil Kurbedinov halqara mukâfatnen taqdirlendi

26.05.201722:10

Bugün, mayıs 26-da Dublinde Qırım adliyecisi Emil Kurbedinovğa telüke astında bulunğan uquq qoruyıcılar içün Front Line Defenders mukâfatı berildi.

«Bu mukâfat – Qırımda vatandaşlarınıñ aq-uquqlarını qorçalağan bütün uquq qoruyıcılar içün bir ğalebedir», – dep ayttı Kurbedinov mukâfatlandıruv merasiminde.

Front Line Defenders mukâfatı er sene, cemiyetleriniñ aq-uquqlarını qorçalavğa, telüke astında bulunıp, büyük isse qoşqan uquq qoruyıcılarğa berile.

2017 senesi jüri azaları 56 devletniñ 142 namzetinden 5 final iştirakçisini sayladı. Finalğa Ukraina, Nikaragua, Vyetnam, Cenübiy Afrika ve Kuveyt uquq qoruyıcıları keçti.

Emil Kurbedinov qırımtatar faalleriniñ çoqusı, mühbirler ve «Hizb ut-Tahrir» işi boyunca yaqalanğanlarnıñ imayecisi ola. Bunen beraber, o, acele çağıruvlarğa cevap berip kele ve faallerniñ evlerinde tintüvler keçirilgen vaqıtta insan aqları bozuvlarını yazıp qayd ete.

Bundan da ğayrı, o, memuriy yaqalavnen cezalanğan edi. Böyleliknen, 2017 senesi yanvar 26-da o, evinde tintüv keçirilgen Seyran Saliyevge uquqiy yardım köstermek içün ketkende yaqalandı. Rayon mahkemesi Kurbedinovnıñ «ekstremistik teşkilâtlarnı teşviq etkeninde» qabaatlı olğanını tanıdı ve onı 10 kün memuriy yaqalavnen cezaladı.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET