Bağçasaray mahkemesi qırımtatar bayrağınen maşna aydağan aydayıcını para cöremesinen cezaladı

31.05.201710:10

Bağçasaray mahkemesi qırımtatar bayrağınen maşna aydağan faal Amethan Yusupovnı 10 biñ ruble para cöremesinen cezalamaq qararını çıqardı.

Bu aqta yerli faal Server Mustafayev bildirdi.

Onıñ sözlerine köre, imaye tarafı, mahkemeci em qabaatlav tarafı, em de mahkeme tarafı olmasın dep, toplaşuv protokolı tizilmesi ve davağa prokurornıñ celp etilmesi aqqında şefaat arizalarını berdi. Mahkeme şefaat arizalarını qanaatlendirmedi, dep bildire «Qırım.Aqiqat».

Mustafayev qayd etti ki, diger iştirakçilerniñ memuriy davalarını baquv boyunca toplaşuvlar mayıs 31-de keçirilecek.

Avdetniñ evel bildirgenine köre, Bağçasarayda mayıs 18-de qırımtatar bayraqlarınen yürgen avtomobillerniñ aydayıcıları yaqalandı. Beş aydayıcığa nisbeten protokollar tizildi. Yaqalanğanlar añlatma mektüplerini yazdı.

Belli ki, keçken sene maşnalarında qırımtatar bayraqları olğanı içün Sudaq, Bağçasaray ve İslâm Terek (Kirovskoye) sakinleri para cöremesinen cezalandı. «Sudaqlı dört kişiniñ» davası eñ belli oldı.

Hatırlatamız ki, 2016 senesi mayıs 18-de şeerde milliy bayraqlarnen maşnanen yürgen Sudaq sakinleri Ablâkim Ablâkimov, Enver Çavuş, Seytmamut Seytumerov ve Alim Muslâdinov memuriy qanun bozğanlarınen qabaatlı tanıldı. Olarnıñ er biri 20 biñ ruble para cöremesinen cezalandı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.