Mayıs 30-da Aqmescitte (Simferopol) qırımtatar edebiyatı klassigi Riza Fazılnıñ 89 yaşına bağışlanğan dua merasimi keçirildi.
Bu aqta qırımtatar faali, Qırımtatar tasil hadimleriniñ «Maarifçi» assotsiatsiyası reisi Safure Kacametova Facebook saifesinde bildirdi.
Merasim çoq yıl devamında Riza Fazılnıñ yolbaşçılığında çalışqan Qırımtatar yazıcılar birligi tarafından teşkil etildi. Duağa qırımtatar cemaat erbapları, yazıcılar, artistler ve klassikniñ yaqınları keldi.
Bu yerde Riza Fazılnıñ şiirleri, bunen beraber, oña bağışlanğan eserler oquldı. Böyleliknen, «İlham» yazıcı klubınıñ azası Aliye Seytumerova Riza Fazılğa bağışlanğan şiirni oqudı.
Riza Fazıl 2016 senesi noyabr ayında 88 yaşında olıp vefat etti.
Riza Fazıl 1929 senesi mayıs 30-da Qarasuvbazar rayonınıñ Barın köyünde köy ocasınıñ qorantasında dünyağa keldi. 1965 senesinden başlap, 1980 senesine qadar Taşkent şeerinde qırımtatar tilinde çıqqan Lenin Bayrağı gazetasında terciman, edebiy hadim, edebiyat ve sanat bölüginiñ müdiri vazifelerinde bulundı. 1980-1994 seneleri Yıldız mecmuasında başta şiiriyet bölüginiñ müdiri olıp, 1987 senesinden ise derginiñ mesül kâtibi vazifesinde çalıştı.
Riza Fazılnıñ büyük işlerinden biri şu ki, o, Qırımtatar edebiyatı ve islâm tarihında birinci olıp, bütün dünya musulmanlarınıñ muqaddes kitabı olğan Quran-ı Kerimni Qırımtatar tiline çevirip, onı 1991-1994 seneleri devamında Yıldız mecmuasında derc ettirdi. 1998 senesi ise o, Quran-ı Kerimniñ şu tercimesini ayrı kitap etip çıqarmağa nail oldı.
1993-de Ukraina Yazıcılar Cemiyeti azası olğan Riza Fazıl, 2008-de Qırımtatar Yazıcılar Cemiyeti reisi oldı.
Fotoresimler Safure Kacametovanıñ saifesinden alınğan
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
