Rusiyede resmiy olaraq Türkiyeden mahsulat ketirilüvine razılıq berildi

02.06.201713:15

Rusiye ükümeti yolbaşçısı Dmitriy Medvedev Türkiyeden mahsulat, pamidordan ğayrı, ketirilmesine sıñırlavnı lâğu etken fermannı imzaladı.

İyün 2-de rusiyeli ükümetniñ saytında derc etilgen vesiqağa binaen, Rusiyede türk şirketleri tarafından yapılğan qurucılıq işleriniñ sıñırlanuvı da lâğu etildi.

Avdetniñ evel bildirgenine köre, bu afta Rusiye prezidenti Vladimir Putin Türkiyege nisbeten bazı sanktsiyalarnıñ lâğu etilmesi aqqında fermannı imzaladı. Qarar mayıs 3-te Soçide keçirilgen Putinniñ Türkiye prezidenti Recep Erdoğan ile muzakereler çerçivesinde qabul etildi.

Hatırlatamız ki, Rusiye, türk arbiy uçaqları rusiyeli bomba atıcı uçağını urğan soñ, 2015 senesi noyabr ayında Türkiyege qarşı sanktsiyalar kirsetti, o vaqıt eki rusiyeli asker elâk oldı. Rusiye Türkiyege turistik putövkalarnı satmağa, bir sıra türk mahsulatını ketirmege yasaq etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası