«Milliy Firqa» qırımtatar cemaat teşkilâtı Rusiye Yazıcılar birligi Qırım bölüginiñ idare reisiniñ muavini Oleg Azaryevğe nisbeten cinaiy iş açılmasını talap etti. O, bundan evel qırımtatarlarnıñ sürgünligini aqlağan beyanatlar yazğan edi.
Böyleliknen, «Milliy Firqa» Qırım Cumhuriyeti Prokuraturası, Rusiye Federatsiyası Taqiqat komitetiniñ Qırım Cumhuriyeti boyunca Baş taqiqat idaresi ve Rusiye Federal havfsızlıq hızmetiniñ Qırım Cumhuriyeti ve Aqyar (Sevastopol) şeeri boyunca idaresine RF Cinaiy kodeksiniñ 282 maddesi 2-ci qısmınıñ b) maddesinde belgilengen cinayet («şahıs tarafından, zenaat vazifesini öz menfaatlarında qulannıp, nefret ya da duşmanlıqnı peyda etüv, ve adamnı aşalav») boyunca Oleg Azaryevğe nisbeten cinaiy iş açtırmaq muracaatınen arizalar yolladı.
Bundan da ğayrı, internette qırımtatarofob laflar çoq aytılıp başlağanı munasebetinen cemaat teşkilâtınıñ azaları uquq qoruyıcı organlarını RF Cinaiy kodeksiniñ 282-ci maddesiniñ sıñırlarına kirgen malümatnı tarqatqan Facebook içtimaiy ağındaki akkauntlarnı teşkermege çağırdı. Müellifler arizağa akkaunt cedveli ve içtimaiy ağındaki izaatlarnıñ skrin-kopiyalarını qoştı.
Avdetniñ evel bildirgenine köre, Rusiye Yazıcılar birligi Qırım bölügi idaresiniñ reis muavini Oleg Azaryev qırımtatarlarnıñ 1944 senesi sürgünligini aqlay.
O, Facebook saifesinde «Ne içün Stalin tatarlarnı Qırımdan sürgün etti» adlı maqaleni paylaştı, o maqale tübünde munaqaşalar peyda oldı. Bu munaqaşalarda Azaryev faal iştirak etip, aytqan laflarından utanmadı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
