Qırımda rus tilinde (ana tili olmağan) tasil berilgen mekteplerniñ talebeleri arasında belli rus yazıcısı Aleksandr Puşkinniñ doğğan kününe bağışlanğan rus tili ve edebiyatı olimpiadası teşkil etildi.
Qırımtatar tilinde tasil berilgen Qarasuvbazar (Belogorsk) 4 sanlı mektebiniñ 5-ci sınıf talebesi Edaye İbadullayeva, Aqmescit (Simferopol) akademik gimnaziyasınıñ 6-cı sınıf talebesi Seyt-Ali İrih ve Kezlev (Yevpatoriya) 13 sanlı mektebiniñ 8-cı sınıf talebesi Vladimir Kutkovoy yarış ğalipleri oldı.
Olimpiada RF Federatsiya Şurası, Rusiye rektorlar birligi, Rusiye tasil akademiyası, RF tasil ve ilim nazirligi tarafından III-ci Halqara Livadiya forumı (2017 senesi, iyün 5-6 künleri) çerçivesinde V.İ. Vernadskiy adına Qırım federal universiteti ve M.V. Lomonosov adına Moskva devlet universitetiniñ esasında keçirildi.
M.V. Lomonosov adına Moskva devlet universitetiniñ rektorı Viktor Sadovniçiy ğaliplerge mukâfatlarnı taqdim etti.
«Eminim ki, olar bu künni unutmaz», – dep emin olğanını bildirdi Vernadskogo adına QFU Tavriya akademiyasınıñ slavân filologiyası ve mühbircilik fakultetiniñ dekanı Galina Bogdanoviç, dep haber ete «Krımskaya gazeta».
Avdetniñ evel bildirgenine köre, üç Qırım mektep talebesi, Eskender Paşayev, Asan Asanov ve Maksim Romançuk, Mental arifmetika boyunca halqara olimpiadada iştirak etip, öz kategoriyalarında çempionlar oldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
