Instagramda qırımtatar tili online kursı peyda oldı

11.06.201716:45

Ars Musik Production studiyası Instagram ağında qırımtatar tili kursını teşkil etti.

Leyha müellifi studiya tesisçilerinden biri, belli televizion alıp barıcısı Ridvan Halilov oldı.

Qırımtatar tili kursı imlâ qaidelerinden başlandı. Dersler 5-ci sınıf içün «Qırımtatar tili» dersligine esaslanıp azırlanıla.

«Adam istese, bir qaç afta ya da bir ay içinde hatasız yazmağa başlar. Bu, şübesizdir», – dep emin olğanını bildirdi Ridvan Halilov.

Dersler aftada eki kere bir saat devamında berilecek. Instagram ağında ARS Musik Production ve ABLYAZGEREY saifelerinde. Ramazan ayında saat 21:00-de. Deñişmeler aqqında leyha müellifleri öz akkauntlarında haber etecek.

Ars Musik Production birleşmesi bir qaç ay evel Asiye Saale, Arsen Osmanov ve Ridvan Halilov tarafından teşkil etildi. Olarnıñ esas maqsadı, qırımtatar yaşlarına maarif bermektir, dep bildire Crimeantatars.club.

Avdetniñ evel bildirgenine köre, belli qırımtatar artisti, yırcı ve bestekâr Arsen Osmanov, «АRS muzik production» muzıkal studiyasınıñ tesisçisi, «Qırım» ansambliniñ solisti Asiye Saale ve mühbir, televizion alıp barıcısı Ridvan Halilov ile, yaş qırımtatar icracılarına karyera yapmağa yardım etmek içün, icat taqımına birleşti.

Hatırlatamız ki, dünyada ilk qırımtatar tili online kursı eki yıl evel mühbir Zenife Seydamet tarafından teşkil etilip, bugünki künde de devam ete.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası